Kano : An fara sauraron karar mutane 3 da ake zargi da laifin kisan kai

Babbar kotun jiha mai zamanta a Miller Road karkashin jagorancin mai shari’a Aisha Mahmud Ibrahim, ta fara sauraron karar da aka gurfanar da wasu mutane uku a gabanta da ake tuhuma da laifin kisan kai.

Wadannan mutane sun hada da Aminu Malam da Martins Joseph da kuma Tahir Tanimu, dukkaninsu mazauna Unguwa Uku a nan Kano.

A ranar daya ga watan Maris din bara ne dai, aka zarge su da kashe wani matashi mai shekaru 18 Shamsu Yakubu, bayan sun caka masa wani makami a kirjinsa.

Laifin da ake zarginsu da aikatawa ya saba sashe na 221 na kundin Penal Code.

Wakilinmu na kotu Bashir Muhammad Inuwa ya rawaito cewa bayan karanta musu kunshin tuhumar sun musanta zargin, daga nan ne mai gabatar da kara kuma lauyan gwamnati Barista Lamido Abba Soron Dinki ya nemi kotu da ta dage sauraron karar zuwa wani lokaci.

Daga nan ne mai shari’a Aisha Mahmoud Ibrahim ta dage zaman shari’ar zuwa ranakun 17 da kuma 18 na watan Nuwamba mai zuwa.