Kogin Haɗeja Jama’are ne ke haddasa mana ambaliyar ruwa a gonaki – Manoma

Ƙungiyar matasan manoman a jihar Jigawa ta ce, ambaliyar da kogin Haɗeja Jama’are ke yi shi ne babbar barazanar da suke fuskanta a kowacce shekara.

Matasan manoman sun ce, matsalar ambaliyar ruwan ita ce ta ke mayar da harkokin noman su baya.

Shugaban ƙungiyar Dauda Ali Kura ne ya bayyana hakan jim kaɗan bayan kammala shirin “Barka da Hantsi” na nan Freedom Radio da shirin ya mayar da hankali kan ƙalubalen da manoman ke fuskanta.

Ali Kura ya ce, a kowacce shekara ambaliyar ruwan na haifar asara ga manoma musamman ma ƙananan manoma, wanda hakan ne yake mayar da harkokin Noman su baya.