Kotu ta yanke wa Sadiya Haruna hukuncin komawa Islamiyya

Yau Litinin rundunar ƴan sandan jihar Kano ta gurfanar da wata mai amfani da kafafen sada zumunta Sadiya Haruna a gaban kotu.

An gurfanar da ita a kotun shari’ar Musulunci da ke hukumar Hisbah, bisa zargin yaɗa batsa a kafafen sada zumunta.

Yayin zaman kotun mai shari’a Ali Jibrin Ɗanzaki ya yanke mata hukuncin sanyata a makarantar Islamiyya ta Darul Hadith har tsawon wata shida.

Za ta riƙa zuwa kullum tare da rakiya jami’in hukuma.

Sannan za ta riƙa sanya hannu a duk sanda ta je.

Sadiya Haruna dai ta shahara a kafafen sada zumunta wajen yaɗa hotuna tare da kalaman batsa.

Tun da farko rundunar ƴan sandan jihar Kano ce, ta karɓi ƙorafi daga mutane kan ayyukan matashiyar.