Lasisin tuƙa adaidaita sahu ya koma dubu ɗari a Kano – KAROTA

Hukumar KAROTA ta ce, daga yanzu lasisin tuƙa adaidaita sahu a Kano ya koma Naira dubu ɗari maimakon dubu takwas da ake yi a baya.

Shugaban hukumar Baffa Babba Ɗanagundi ne ya sanar da hakan a yau Laraba yayin taron manema labarai.

Ya ce, duk wanda ba su yi rajistar neman iznin tuƙin a baya ba, to yanzu ya koma dubu ɗari.

Baffa Babba ya ƙara da cewa, jami’an su na ci gaba da lura domin ɗaukar mataki ga duk wanda aka samu bashi da lasisin.

A cewar sa, Gwamnati ta bayar da lokaci domin ayi rajistar amma, wasu masu kunnen ƙashi suka ƙi yi.