Libya Football: Ali El Margini ya ajiye aiki

Mai horas da kungiyar kwallon kafa ta kasar Libya Ali El Margini ya ajiye aikinsa bayan da kungiyar ta yi rashin nasara a wasanni uku da ta buga.

El Margini ya fara aikin horas da kungiyar a watan Satumba da ya gabata tun a lokacin dai Libya ta yi rashin nasara a wasan sada zumunta da Comoros sai kuma wasanni biyu da Equatorial Guinea a yayin neman tikitin gasar cin kofin Afrika.

Rashin nasarar da Libya ta yi a wasannin ya sanya kasar zuwa na karshe a rukunin J da maki uku, inda kasar Tanzania ke gabanta da maki hudu sai Equatorial Guinea da shida yayin da kuma Tunisia ta yi nasarar samun tikitin zuwa gasar a kakar wasa mai zuwa.

El Margini ya ce “Yanayin da kungiyar ta samu kanta a ciki tare da annobar cutar COVID-19 da kuma rikicin siyasa a kasar ne suka sanya lalacewar ‘yan wasan.”