Lyon ta bawa duniya kwallo mamaki

Kungiyar Kwallon kafa ta Lyon dake kasar Faransa, ta bada mamaki ga duniyar Kwallo inda ta samu galaba a kan kungiyar Juventus daga kasar Italiya, a wasan farko na zagayen siri daya kwale na gasar cin kofin zakarun nahiyar turai a wasan da aka fafata a filin wasa na Groupama Stadium dake kasar Faransa.

Dan wasa Lucas Toussart, wanda ya zo a matsayin aro daga kungiyar Hertha Berlin, ne ya zura Kwallo daya tilo a minti na 31, da take wasa bayan samun taimako daga hannun Houssem Aouar.

‘Yan kallo Dubu 57, da 335 suka kalli wannan wasa, wanda alkalin wasa Jesus Gil, daga kasar Andalus wato Spaniya ya busa.

Yanzu haka dai, kungiyon biyu na dakon karawar su ta biyu, wadda zata tabbatar da waye zai shiga zuwa zagaye na gaba filin wasa na Juventus Stadium, dake birin Turin na kasar Italia.