Majalisar Kolin Shari’ar Musulunci ta bayyana damuwa kan kalaman Rabaran Ezekiel

Majalisar Koli ta Shari’ar addinin musulunci  ta kasa ta bayyana damuwa kan wasu kalamai da wani malamin Coci, Rabaran  Ezekiel Dachomo, ya yi, da ta ce maganganun na kunshe da sakonnin rura rikicin addini da zarge-zarge kan Musulunci da al’ummar Musulmi a kasar nan. 

Ta cikin wata sanarwa da Sakatare Janar na Majalisar, Nafiu Baba Ahmad, Mni, ya sanya wa hannu, ta bukaci hukumomin tsaro su binciki batun tare da ɗaukar matakin doka kan duk wanda aka samu da laifi.

Majalisar ta ce a lokacin da kasar nan ke fama da matsalolin tsaro kamar ta’addanci, fashi da makami da garkuwa da mutane, bai dace wasu su riƙa yin kalaman da za su haddasa rashin jituwa tsakanin al’umma ba.

Ta kuma jaddada cewa addinin Musulunci yana koyar da zaman lafiya da girmama rayuwar ɗan Adam, tare da kira ga shugabannin addinai na Musulmi da Kirista su haɗa kai wajen yin Allah wadai da kalaman da ke haifar da ƙiyayya.