Majalisar zartaswa ta amince da kashe biliyan 4 domin yin wasu ayyuka 3

Majalisar zartaswar Najeriya, ta amince a kashe Naira biliyan hudu domin gudanar da wasu muhimman ayyuka guda uku.

Ayyukan dai sun hada da gina ofisoshin shugabannin jami’ar jihar Osun da Osogbo da kuma na jami’ar Tarayya ta Lokoja, sai kuma samar da tirke eriyar rediyo a hukumar kula da Ilimin makiyaya ta Najeriya.

Ministan Ilimi Malam Adamu Adamu, ne ya bayyana a ganawarsa da manema labaran fadar shugaban kasa jim kadan bayan kammala taron majalisar wanda shugaban kasa Muhammadu Buhari ya jagoranta jiya Laraba a birnin tarayya Abuja.

Malam Adamu Adamu, ya ce, za a yi gine-ginen jami’ar ta jihar Osun ne a kan kudi sama da Naira biliyan 2 cikin wa’adin mako 76 da aka baiwa kamfanin.