Makaman da muke da su, sun tsufa – Babban hafsan tsaron Najeriya.

Babban hafsan tsaron ƙasar nan Janar Lucky Irabor, ya ce, sojojin Najeriya ba za su iya samun nasarar kakkaɓe ayyukan ƴan ta’adda ba, matukar ba a samar musu da makamai na zamani ba.

A cewar sa, dalilin hakan ne ya sanya sojojin ƙasar nan su ke ƙokarin sayo sabbin makamai don yaƙi da ƴan ta’adda.

Janar Lucky Irabor ya bayyana hakan ne a wajen taron cin abici da aka shirya don karrama sojojin da suka kammala karatu a kwalejin manyan hafsoshin soji da ke Jaji a jihar Kaduna.

Babban hafsan sojin na Najeriya, ya kuma ce, samun nasara kan ƴan boko haram da sauran ƴan ta’adda da ke aikata ta’asa a sassa daban-daban na ƙasar nan, yana buƙatar ɓullo da sabbin dabaru waɗanda za su taimaka wajen kawo ƙarshen matsalara baki  ɗaya maimakon dogara ga soji kawai.