Masarautar Ƙaraye ta dakatar da dagacin Madobawa daga muƙamin sa

Mai martaba sarkin Karaye Alhaji Ibrahim Abubakar na II ya dakatar da dagacin Madobawa Malam Shehu Umar daga mukaminsa.

Hakan na cikin wata sanarwar da mai magana da yawun masarautar Haruna Gunduwawa ya fitar ga manema labarai.

Sanarwar ta ce an dakatar da dagacin Malam Shehu Umar ne sakamakon rashin nuna da’a da karfa-karfar da yake nunawa mutanen da yake wakilta.

Kazalika sanarwar ta ce an wakilta Magajin Garin Karaye Injiniya Shehu Ahmad a matsayin wanda zai wakilci kwamatin da aka kafa, domin bincikar dagacin.

Sarkin na Karaye Alhaji Ibrahim Abubakar na II ya umarci Magajin Garin na Karaye da ya wakilta wanda zai ci gaba da kula da kujerar dagacin ta Madobawa.

Kazali sanarwar ta ce an dakatar da Sarkin Kasuwar Karaye Alhaji Sa’adu Abdulkadir har zuwa wani lokaci.