Masu bada bayanan sirri ga masu garkuwa da mutane sun shiga hannu

Rundunar ‘yan sandan jihar Niger tayi nasarar kama wasu mutane biyu da ake zargin suna taimakawa masu yin garkuwa da mutane da bayanan sirri a jihar.

Babban kwamandan yankin na Suleja CSP Sani Badarawa ne ya tabbatar da hakan.

Ya ce, mutanen biyu an kama su ne a unguwar Juma, yayin da rundunar yaki da masu fashi da makami ke gudanar da ran-gadi a yankin.

Shaidun gani da ido a yankin sun bayyana cewa daya daga ciki mai suna Abubakar an kama shi ne bayan ya ajiye abin hawan sa.

CSP Sani Badarawa ya ce, tuni suka aike da wadanda ake zargi zuwa shalwakatar binciken kwakwaf da ke Minna don fadada bincike.