KADIRIYYA – Ayi doka da zata ja layi ga masu wakokin batanci

Shugaban darikar kadiriyya na Afrika Sheikh Kariballah Nasiru Kabara, ya bukaci gwamnatoci a matakai daban daban da su samar da dokoki masu tsauri da zasu rika hukunta masu batanci kan janibin Annabi Muhammad (S.A.W).

Sheikh Karibullah na bayyana hakan ne a wata tattaunawa da yayi da manema labarai a nan Kano.

Shehin malamin ya bayyana cewa, ya yaba da matakin hukuncin kisa ta hanyar rataya da gwamnatin jihar Kano da majalisar dokokin jihar har ma da kotuna suka dauka kan wani mawaki da yayi kalaman batanci kan janibin Annabi a baya baya nan.

Sheikh Kariballah ya kara da cewa, wannan hukunci na kotu yayi dai-dai da hukunce hukuncen da addinin musulunci ya tsara.

Wakilin mu Muhammad Harisu Kofar Nassarawa ya rawaito cewa, a yayin tattaunawar sheikh Kariballah Nasir Kabara ya jaddada cewa, irin wadannan halaye da dabi’u da mutane suke aikatawa shi ke janyo rashin zaman lafiya da talauci har ma da fushin ubangiji.