Mun hana cin gashin kai ga kowace hukumar wasanni – Dare

Ministan matasa da wasanni, Sunday Dare ya ce babu wata hukuma dake cin gashin kanta a karkashin ma’aikatar wasanni ta Najeriya.

Dare ya yi wannan gargadin ne yayin da yake kaddamar da sabon zababben shugaban hukumar guje-guje da tsalle-tsalle ta kasa AFN Tonobok Okowa a Abuja.

Ministan ya ce baya goyon bayan yadda shugabancin hukumar AFN ya dare gida biyu tare da gudanar da zabe daban-daban a ranar Litinin 14 ga watan Yuni.

An gudanar da mabanbantan zabukan biyu a Abuja da Birnin Kebbi inda aka zabi Tonobok Okowa a matsayin shugaban tsagi guda na hukumar, yayin da a daya bangaren kuma aka zabi Shehu Gusau.

“Domin gudun rudani, babu wata hukumar wasanni da aka sahale wa cin gashin kanta kowace na a karkashin ma’aikatar wasanni ta kasa, “ inji Dare.

Dare ya kuma ce, “Mun jaddada amincewar mu da Tonobok Okowa a matsayin sabon zababben shugaban hukumar AFN a yanzu.”