Mun shirya tsaf wajen tunkarar zaben gwamnoni- INEC

Shugaban hukumar zaɓe ta Nijeriya INEC Farfesa Mahmood Yakubu, ya tabbatar da cewa za a yi amfani da na’urar BVAS a zaɓen gwamnoni da na ‘yan majalisar dokokin jihohi da ke tafe a makon gobe.

Farfesa Mahmood Yakubu, ya tabbatar da hakan ne a ranar Asabar, yayin ganawa da kwamishinonin hukumar zaɓe na jihohi a shalkwatar hukumar da ke Abuja.

Ya ce, za a yi amfani da na’urar BVAS a zaɓen, kuma ana sake duba na’urorin domin kauce wa matsalolin da suka bayar, a wasu wuraren a zaɓen makon da ya gabata.