Muna cikin halin fargaba – Mutanen Maru

Rahotanni daga garin Kadauri a ƙaramar hukumar Maru ta jihar Zamfara na cewa, wasu ƴan bindiga sun hallaka mutane tara, tare da jikkata wasu da dama.

Ƴan bindigar sun kuma yi awon gaba da dabbobi a garin, kamar yadda wani mazaunin garin ya shaidawa wakilin mu Yusuf Ibrahim Jargaɓa cewa bayan maharan sun shigo kauyen sai suka buɗe wuta a kan mutane.

Wakilin na mu ya tuntuɓi jami’in hulɗa da jama’a na rundunar ƴan sanda na jihar ta Zamfara SP. Shehu Muhammad wanda ya ce zai yi magana da kwamishinan ƴan sandan jihar daga bisani zai tuntuɓeshi, amma dai har kawo lokacin da mu ke haɗa wannan labari bai tuntuɓe shi ba, kuma ko da ya ƙara kiransa bai ɗaga wayar ba.

Jihar Zamfara dai na cikin jihohin da ake samun yawaitar rahotannin hare-haren ƴan ta’adda.