NAFDAC: An rufe gidajen ruwan leda a Sokoto

Hukumar kula da ingancin abinci da magunguna ta ƙasa NAFDAC ta rufe wasu gidajen da suke samar da ruwan leda 38 sakamakon karya dokokin yin kasuwanci a jihar Sokoto.

Shugaban hukumar a jihar Malam Garba Adamu ne ya bayyana hakan, yayin zantawar sa da manema labarai.

Ya ce, sama da ledar ruwa dari uku ne aka kama, a ƙananan hukumomi 23 waɗanda kuma sun yi rijsta sai dai sun saɓa doka.

Malam Garba Adamu ya ce, matakin ya biyo bayan ayyukan da hukumar ta fara a ranar 19 ga watan da muke ciki, don kiyaye lafiyar al’umma ta hanyar abubuwan da suke saya don amfanin su, da kuma tabbatar da sun bi dokokin da NAFDAC ke sanyawa.