NAHCON za ta kaddamar da jirgin farko na maniyyata

Hukumar kula da aikin Hajji NAHCON, ta ce, za ta kaddamar da jirgin farko na jigilar maniyya hajjin bana a ranar 25 ga watan Mayu da muke ciki, wanda zai fara diban maniyyatan jihar Nasarawa.

Shugaban hukumar ta NAHCON, Zikrullah Kunle Hassan, ne ya bayyana hakan yayin kaddamar da tawagar masu aikin yada labaran hajjin bana wanda aka gudanar a Abuja.

Zikrullah Kunle Hassan ya bukaci jami’an yada labaran da su sanya gaskiya da adalci a dukkanin rahotannin da za su bayar, kafin aikin hajjin da kuma lokacin yinsa har ma da bayan an kammala.

Ya kuma ce, tawagar ma’aikatan kula da aikin hajjin bana za su tafi kasa mai tsarki a ranar Lahadi mai zuwa don shirye-shiryen karbar maniyyatan Nijeriya, inda ya tabbatar da cewa aikin hajjin bana zai gudana ba tare da wata matsala ba.