Za a yi jana’izar tsohon gwamnan Kaduna bayan sallar la’asar

Iyalan marigayi Alhaji Abdulƙadir Balarabe Musa tsohon gwamnan tsohuwar jihar Kaduna sun ce za ayi jana’izar marigayin da karfe 4 na yamma bayan sallar la’asar.

Za ayi jana’izar a masallacin jumu’a na Sultan Bello da ke Kaduna.

Ɗaya daga cikin ƴaƴan marigayin Hajiya Zulai Balarabe Musa ce ta bayyana hakan ga Freedom Radio.

Hajiya Zulai ta ce, Sheikh Dr. Ahmad Gumi ne zai yiwa marigayin Sallah.

Marigayi Balarabe Musa ya rasu ne da safiyar Laraba a birnin Kaduna bayan ya sha fama da jinya.

Ya rasu ya bar ƴaƴa takwas da mace guda.

Muna addu’ar Allah ya jiƙansa.