NDLEA: Mun kama dillalan miyagun ƙwayoyi 89 a jihar Kaduna

Hukumar yaki da sha da fataucin miyagun kwayoyi ta kasa NDLEA ta ce tsakanin watan Janairu zuwa Mayu ta samu nasarar kama wasu mutane 89 wadanda ake zarginsu da safarar miyagun kwayoyi a jihar Kaduna.

Kwamandan hukumar a jihar ta Kaduna Iyke-Uche Samuel shine ya bayyana haka yayin wani taron manema labarai jiya a Kaduna.

Ya ce, jami’an hukumar cikin wannan wa’adi ta samu nasarar kwace miyagun kwayoyi mai nauyin kilo sama da dubu daya da dari bakwai da ashirin da daya.

A cewar sa, cikin miyagun kwayoyin da hukumar ta kwace sun hada da: Tabar wiwi, Tramadol, Tabar iblis, da sauran wasu miyagun kwayoyi daban-daban.