Hukumar NDLEA ta kama mutane 2 bisa zargin su da safarar miyagun kwayoyi

Hukumar hana sha da fataucin miyagun kwayoyi ta kasa NDLEA ta damke wasu mutane biyu da take zargi da safarar muggan kwayoyi a garin Onitsha na Jihar Anambra.

Hukumar ta kama Solomon Michael da bisa zargin safarar tabar wiwi yayin da ta damke Okechukwu Udenkwo bayan samunsa da Hodar Ibilis wato Cocaine.

A zantawarsa da manema labarai a garin Awka, babban kwamandan hukumar na Jihar ta Anambra Sule Momodu ya bayyana cewa Solomon Michael ya kware wajen dillancin tabar wiwi a garin Onitsha, yayin da Okechukwu Udenkwo kuma ya kware cikin safarar Hodar Ibilis a Nando.

Sannan ya kuma nemi hadin kan shugabannin al’ummar yankunan Jihar baki-daya, musamman ma wajen sanar da hukumar da zarar sun samu labarin bullar muggan mutane masu safarar miyagun kwayoyi.