Ndume ya nemi Buhari ya yi bayani kan matakin da zai dauka akan ‘yansanda

Shugaban kwamitin kula da harkokin soji na majalisar dattijai Sanata Ali Ndume ya bukaci shugaba Muhammadu Buhari da ya yiwa al’ummar kasar nan bayani kan matakan da yake shirin dauka na jami’an ‘yan sandan kasar nan.

Dan majalisar ya yi kiran ne a zaman da majalisar dattajan tayi a ranar Talatar da ta gabata, wanda majalisar ta bukaci shugaba Buhari da yayiwa al’ummar kasar nan jawabi kan halin da ake ciki.

Sanata Ndume ya kara da cewa duba da yanayin da ake ciki na kara ta’azzarar zanga-zangar akwai bukatar shugaba Buhari ya dau matakan da suka kamata don kawo karshen lamarin.