NiMet ta yi hasashen samun mamakon Ruwa mai dauke da Iska da tsawa

Hukumar Kula da Yanayi ta Najeriya NiMet, ta yi hasashen samun tsawa da Iska hadi da ruwan sama mai karfi a sassan kasar nan daga yau Litinin zuwa Laraba mai zuwa.

Hukumar ta kuma ce, ana sa ran samun tsawa mai hade da ruwan sama kadan a wasu sassan jihohin Taraba da Kebbi.

Daga baya kuma, za a samu tsawa da matsakaicin ruwan sama a sassan Arewa maso Gabas da jihar Kaduna, Taraba da Kebbi.

A yankin Arewa ta Tsakiya kuwa, NiMet ta ce za a samu tsawa da ruwan sama kadan a wasu sassan Jihar Neja, yayin da yamma ake sa ran samun tsawa da matsakaicin ruwan sama a mafi yawan yankin.

A yankin kudu kuwa hukumar ta yi hasashen samun gajimare, tare da yiwuwar samun tsawa da ruwan sama kadan a wasu sassan jihohin Bayelsa, Rivers, Akwa Ibom da Cross River.