Gwamnatin Zamfara ta yi wa ma’aikatan lafiya ƙarin albashi na kaso 95

Gwamnatin Jihar Zamfara ta amince da ƙarin albashin ma’aikatan lafiya da kashi casa’in da biyar cikin ɗari.

Sabon tsarin albashin ya fara aiki tun daga ranar bakwai ga watan Satumban 2026, inda aka tsara shi bisa tsarin albashin ma’aikatan lafiya da Gwamnatin Tarayya ta amince da shi.

Shugaban Ma’aikatan Gwamnatin Jihar Zamfara, Shehu Baraya, ne ya bayyana hakan a cikin wata takarda mai ɗauke da kwanan wata 10 ga Satumba, 2026.

Ya ce ƙarin albashin wani ɓangare ne na sauye-sauyen da gwamnatin Gwamna Dauda Lawal ke yi domin inganta harkokin kiwon lafiya da kuma walwalar ma’aikatan lafiya a jihar.

Gwamnatin ta bayyana cewa ƙarin albashin zai taimaka wajen ƙarfafa ma’aikatan lafiya, da kuma samar da kyakkyawan yanayin aiki domin inganta harkokin bayar da kiwon lafiya ga al’umma.