NUJ ta nemi shugabanni su jajirce wajen kare haƙƙoƙin ma’aikata

Ƙungiyar ƴan jarida ta kasa reshen jihar Kano ta ce, za ta ci gaba da kare mutuncin ƴan jarida a kowanne mataki, baya ga ƙarfafa musu gwiwa don gudanar da ayyukan su yadda ya kamata.

Shugaban ƙungiyar reshen Jihar Kano Kwamared Abbas Ibrahim ne ya bayyana hakan yayin rantsar da sababbin shugabannin ƙungiyar na tashar Freedom Radio a yau Laraba.

Kwamaret Abbas ya buƙaci sabbin shugabannin da su yi aiki tuƙuru da kiyaye haƙƙoƙin ma’aikata hadi da ƙara ƙaimi wajen sauke nauyin da aka ɗora musu.

Da take jawabi, sabuwar shugabar ƙungiyar Kwamaret Aisha Muhammad Ƴalleman ta ce, za suyi aiki tuƙuru, tare da kawo ci gaba ga ma’aikatan Freedom Radio.

Daga cikin waɗanda aka rantsar a yau, akwai Kwamared Aisha Muhammad Yalleman a matsayin shugabar Kungiyar sai Abdullahi Isa a matsayin mataimakin shugaba sai Muzammil Ibrahim Yakasai a matsayin Sakatare.

Sauran sune Abdulkarim Muhammad Abdulkarim a matsayin mataimakin sakatare, sai Adamu Sulaiman Muhammad a matsayin mai binciken kuɗi sai kuma Shamsiyya Farouk Bello a matsayin ma’ajin kungiyar, da kuma Tijjani adamu a matsayin Odita.