Rashin wadatattun likitoci ya sa kowanne likita ke ganin mara lafiya¬ 1800 a rana – NMA

Kungiyar likitoci ta ƙasa NMA reshen jihar Kano ta koka kan rashin wadatattun likitoci a kasar nan.

Shugaban ƙungiyar ana Kano Dakta Usman Aliyu ne ya bayyana hakan.

Ya ce “Rashin wadatattun likitoci a ƙasar nan ya sa kowanne likita ke ganin mutane 1800 a kowacce rana, domin kuwa a yanzu Kano na da likitoci sama da dubu 1, 600 waɗanda su ke duba marasa lafiya a asibitocin jihar.

Sai dai ya tabbatar da cewa akwai matsalar likitocin a faɗin ƙasar nan, wanda hakan ke da nasaba da irin matsalolin da mutane ke fuskanta.

“Adadin al’ummar jihar Kano a yanzu ya kai sama da miliyan 20, wanda hakan ta sa likitocin ke iya ganin mutane 1800 a duk rana” inji Dakta Usman Aliyu.

Wannan dai ya biyo bayan yadda har yanzu likitoci masu neman ƙwarewa suka gaza janye yajin aikin da suka shafe kwana 60 suna yi.