Rundunar sojojin sama ta dakile wasu ayyukan mayakan Boko-Haram

Rundunar sojojin saman kasar nan, ta ce; ta dakile ayyukan mayakan Boko-Haram a yankunan Bulagalaye da Kwakwa a jihar Borno sakamakon hare-hare da ta yi ta kaiwa ta sama.

Daraktan yada labarai na rundunar Air Vice Marshal Olatokunbo Adesanya ta cikin wata sanarwa, ya ce; an kai hare-haren ne a ranar Lahadin makon jiya.

Ya ce sun samu nasara sosai wajen hare-haren, ba ya ga wadanda suka kashe wasu sun tsere da raunuka a jikin su.

Air Vice Marshal Olatokunbo Adesanya ta cikin sanarwar ya kara da cewa, tun da fari sun samu rahotannin asiri da ke cewa mayakan na Boko-haram sun yi tunga a wani waje da ke yankin, lamarin da yasa suka tura da jirage domin kai musu hari.

Sanarwar ta kuma bukaci al’ummar kasar nan musamman mazauna yankunan da ke fama da matsalar tsaro da su rika sanar da rundunar da zaran sun ga bakin fuska a yankunan su.