Rundunar ‘yan sandan Najeriya ta tura karin ‘yan sandan kwantar da tarzoma jihar Imo

Rundunar ‘yan sandan kasar nan ta tura karin ‘yan sandan kwantar da tarzoma da kwararrun jami’an ta don samar da tsaro a jihar Imo, bayan harin da ‘yan bindiga suka kai a shalkwatar ‘yan sanda da kuma gidan gyaran hali da ke garin Owerri.

Sufeton ‘yan sandan kasar nan Mohammed Adamu ne ya bada umarnin a yau Litinin.

A wata sanarwar da mai magana da yawun Rundunar ‘yan sandan, kasar nan CP Frank Mba ya fitar, ta ce ,maharan sun kai hari ne da manyan makamai da suka hada da RPG da sinadaran fashewa na IED da kungiyar ‘yan ta’adda ta rajin samun kasar Biafra ta saba amfani da su.