Connect with us

Labarai

Shekaru biyar da harin masallacin Kano: Rabon da Liman ya katse Salla fiye da shekaru dari biyar

Published

on

Babban masallacin Kano

YADDA AKA KAI HARI BABBAN MASSALLACIN

A ranar 28 ga watan Nuwambar Shekarar 2014 ne al’ummar jahar Kano suka fuskanci wani mummunan hari da ba’a taba yi ba a tarihin jahar .

Wannan shi ne hari da aka kai babban masallacin Juma’a na jahar Kano lokacin da liman ya kabbara raka’a ta farko a yayin da yake gabatar da sallar juma’a ta wannan rana.

A lokacin da aka kai  harin  al’ummar arewacin Najeriya da ya hada da na yankin arewa maso yamma da na arewa maso gabas su ke fama da harin ‘yan tayar da kayar baya .

Harin da aka kai masallacin juma’ar ta Kano ya yi sanadin asarar rayukan masallata da dama ,wanda ba za’a iya kiyasce yawan su ba.

Harin na masallacin da ke harabar gidan mai martaba sarkin Kano ta wajen kofar kwaru , ya janyo asarar rayukan manya da yara da suka halacci sallar juma’a ta wannan rana.

A lokacin da abun ya faru tarayyar Najeriya na shirin gudanar da babban zaben shekarar 2015 , wanda hakan ya sa ‘’yan siyasa da dama a wannan lokaci su ke  yakin neman zabe , wanda daga bisani su kayi ta tururuwa zuwa jahar Kano domin jajantawa da yin ta’aziyya ga ilahirin al’ummar ta jahar Kano da gwamnati.

Bayan kammala huduba babban liman ya tayar da sallah sai masallata suka fara jin harbe harbe da karar fashewa haka ya sa masallata da liman suka katse sallah suka gudu.

A tsawon na shekaru biyar da harin ya faru, al’umma daga ciki da wajen jahar Kano da ma Duniya baki daya sun jajanta al’amarin harin na bama bamai da aka kawo wa babban masallacin juma’a na farko a birnin na Kano.

Wannan hari dai an kawo shi ne zamanin tsohon shugaban kasa Goodluck Jonathan wanda aka zargi gwamnatin sa da yin ko in kula da yaki da ‘’yan tayar da kayar baya.

Harin babban masallacin na birnin Kano ya saka al’umma da dama sun girgiza , wanda hakan ya saka daga wannan lokaci duk wanda zai shiga masallaci a arewacin Najeriya sai an sa wata na’ura an bincike shi.

A ranar juma’ar 28 ga watan Nuwambar ta shekarar 2014 , al’ummar jahar Kano sun rika yin tururuwa zuwa asibitin kwararru na Muratala Muhammad da ke tsakiyar birnin Kano domin bayar da gudunmawar jini ga wadanda suka jikkata a harin.

Sakamakon bayar da gudunmawar ta jinin ya saka hukumomin asibitin na Murtala a wannan lokaci suka bayar da sanarwar cewa jinin da al’umma suka bayar ya ishe su.

 

TAIMAKON AL’UMMA.

A ranar da aka kai harin masallacin  mai martaba sarkin Kano malam Muhammadu Sunusi II bai dade akan karagar sarautar Kano ba ,sai da ya katse ziyarar da yake yi a kasar Faransa ya dawo gida domin alhini da jajantawa al’ummar sa da harin na ya rutsa da su.

Bayan dawowar mai martaba sarkin Kano Muhammadu  Sunusi II , ya shiga masallacin da kansa ya ga irin barnar da harin ya haifar.

Bayan ganewa idanun sa hakan , mai martaba Muhammadu Sunusi II ya  jagoranci salloli biyar a harabar masallacin na juma’a, har ya umarci al’ummar Kano da su gudanar da azumi na wasu ‘’yan kwanaki.

Shi da kansa mai martaba Sarki Muhammadu Sunusi II ya gudanar da azumin ,inda yake jagorantar sallar magariba a  harbar masallacin kuma a sha ruwa tare da shi domin nuna alhini .

Mai martba sarkin Kano Muhammad Sunusi na jagorantar salla a satin harin

Mai martaba sarki Muhammadu Sunusi II ya bayar da gudunmawar fiye da Naira miliyan ashirin ga wadanda harin ya rutsa da su.

Bayan haka shugabanni da kungiyoyi na al’umma sun rika ziyarar jihar Kano ,inda suke zuwa fadar mai martaba Sarki da gidan gwamnatin jahar Kano zamanin injiniya Rabiu Musa Kwankwaso domin bayar da gudunmawar su ta kudade domin taimakawa wadanda suka rasa rayukansu.

WANNE HALI WANDA HARIN YA RUTSA DA SU SUKE CIKI?

Bayan wandanda suka rasa rayukan su a harin bam din na babban masallacin juma’ar na Kano, al’ummar da suka jikkata  ba za’a kiyasce adadin su ba.

Daga cikin wadanda suka jiikkatan da dama daga cikin su sun rasa wasu bangarori na jikin su.

Shekaru biyar kenan da kai harin har yanzu wasu basu warke ba, bayan rashin warkewar ,ko a shekarar bara wasun su sun koka da yadda taimakon da ya kamata a basu bai kai gare suba.

Akwai mata da dama da aka tafi aka bar musu marayu daga daya biyu har zuwa goma sha, Allah madaukakin sarki ne ya san halin da suke ciki.

Shin ko ya zuwa yanzu akwai masu bibiyar lamarin su?

ABIN AL”AJABI

Al’umma da dama musamman ma masu kula da makabartu a jihar Kano sun shaidawa manema labarai a wancan lokaci cewa makabartun birnin Kano da kewaye basu taba karbar al’umma da suka rasa rayukan su kuma ake ta kawo gawawwaki irin na wannan lokaci.

Wasu da manema labarai suka ji ta bakin su a shekarar bara ta 2018, sun ce har a wannan loakci akwai harsasai a jikin su da ba’a cire ba sakamakon rashin abun hannu.

RABON DA LIMAN YA KATSE SALLAR JUMA’A YA GUDU AN KAI SHEKARU FIYE DA DARI BIYAR.

Masana tarihi sun bayyana cewa wannan masallaci da ke kofar Kwaru a harabar fadar mai martaba sarkin Kano, an kai tsawon shekaru fiye da dari biyar liman da mamu basu katse sallar juma’a sun tsere ba, sai a wannan rana ta Juma’a 28 ga watan Nuwambar shekarar ta 2014.

Sarkin Kano Muhammadu Rumfa ne ya gina wannan masallaci na harabar fadar mai martaba sarki tun a shekarun 1463 zuwa da 99 sanda yana mulkin Kano.

Sauran Sarakuna sun cigaba da habaka wannan masallaci inda sarkin Kano marigayi Abdullahi Bayero da ya mulki Kano daga shekarun 1926 zuwa 1953 ya yi wa wannan masallaci gini na zamani wanda har yanzu shi ne tsarin yadda masallacin yake.

Sai dai bayan harin, Sarkin Kano mai ci a yanzu Muhammadu Sunusi II ya sa an kewaye harabar masallacin sakamakon kai harin da aka yi wanda har izuwa yanzu ba’a san kiyasin mutanan da suka rasu ba.

MENENE MAFITA?

Tunda har ya zuwa yanzu ba’a kai ga gane halin da ake ciki ba game da wadanda suka jikkata, wasu kuma sun nakasa, ya kamata mahukunta da al’ummar gari su bibiyi halin da wadannan al’umma ke ciki domin kafa asusun tallafa musu.

An kafa asusu iri –iri a jahar Kano domin tallafawa wadanda balahira ta shafa kamar konewar kasuwar Sabongari da kuma fito da asusu na tallafawa harkokin ilimi da sauran su.

Me ya kamata a duba game da wadannan bayin Allah da suka riga mu gidan gaskiya da su da iyalansu da kuma wadanda suka daina fita sakamakon nakasa ,lokaci ne kawai zai bayyana hakan.

Coronavirus

Covid-19: El-rufa’i ya kara tsawaita dokar kulle a Kaduna

Published

on

Gwamnan jihar Kaduna Malam Nasir El-rufai ya kara tsawaita dokar kulle da zaman gida tsawon makonni biyu a jihar.

Mataimakiyar gwamnan jihar Dakta Hadiza Sabuwa Balarabe ce ta bayyana hakan, cikin wata sanarwa da fitar a yammacin Talatar nan wanda ta ce gwamnati ta tsawaita dokar kulle da zaman gida a jihar ne domin dakile cutar Corona.

Sanarwar ta bukaci al’ummar jihar ta Kaduna da su cigaba da daukar matakan kariya da masana kiwon lafiya suka gindaya na sanya takunkumin rufe baki da hanci, da yawaita wanke hannu da kuma bada tazara a tsakanin juna, sannan al’umma su kaucewa taron jama’a masu yawa.

Haka kuma gwamnatin jihar ta ce a yanzu al’umma za su rika sararawa a ranaku guda uku a jere cikin mako ranakun sune, ranar Talata Laraba da kuma ranar Alhamis.

Kananan wuraren kasuwanci da aka amince su bude za su rika fitowa a wadannnan ranaku daga karfe 10 na safe zuwa 4 na yamma.
Su kuwa jama’a masu zirga-zirga za su rika fita ne daga karfe 6 na safe zuwa 6 na yamma a ranakun.

Har ila yau gwamnatin Kaduna ta gargadi ‘yan kasuwannin da ba a amince musu su bude ba, kan suyi biyayya da dokokin da aka sanya.

Har ila yau, sanarwar ta kara da cewa kotun tafi da gidanka zata cigaba da ayyukanta domin hukunta masu karya dokoki da kuma masu yawon dare a yayin dokar kullen.

Haka kuma gwamnatin Kaduna tace makarantu da wuraren ibadu dukkansu za su cigaba da zama a kulle.

Sanarwar tace yanzu haka jihar Kaduna ta yiwa mutane dubu daya da dari tara (1900) gwajin cutar Corona inda ta samu mutane 189 dake dauke da cutar.

A karshe gwamnatin Kaduna ta ce cikin wannan karin makonni biyu zata mayar da hankali wajen kara habaka ayyukanta na yaki da cutar Coronavirus.

*BS*

Continue Reading

Coronavirus

‘Yan kasuwa sun nemi Ganduje ya bude Kasuwanni sau biyu a mako

Published

on

‘Yan Kasuwa sun  bukaci gwamnan jihar Kano, Dakta Abdullahi Umar Ganduje, da ya duba dokar kulle na zaman gida tare da bada dama ga ‘yan Kasuwannin Sabongari da Kwari da na  Singer domin fitowa Kasuwancin su a kebabbun ranakun  da aka ware a mako don gudanar da nasu Kasuwancin.

Alhaji Imamu Tafida, Tafidan Dakayyawa kuma daya daga cikin Dattijan Kasuwar Muhammad Abubakar Rimi, wato Sabongari shi ne yayi wannan kira duba da mawuyacin halin da ‘yan Kasuwan suke ciki kamar yadda jagororin  Kasuwar suka tabbatar.

Alhaji Imamu Tafida, ya ce ‘yan kasuwa da dama, sun tafka asara ta miliyoyin nairori sakamakon rufe kasuwannin, kasancewar kayan da suka siyo basu shigo ba dalilin hana shige da fice, hakazalika wanda ake dasu a kasuwar ba a siyar dasu ba.

Tafidan Dakayyawan, ya kuma bada tabbaci ga gwamnati na cewar zasu yi duk mai yiwuwa wajen daukar matakan kariya daga cutar ta Corona daga bangaren su da masu mu’amala dasu da zarar an basu damar gudanar da Kasuwancin su.

Wakilin mu, Aminu Halilu Tudunwada, ya ruwaito mana cewa, Alhaji Imamu Tafida, ya bukaci al’umma dasu bi umarnin hukumomi da ma’aikatan lafiya, tare da rubanya addu’a domin ganin an kawar da wannan annoba da ta kawo tsaiko a al’amuran yau da kullum na jama’a.

Continue Reading

Coronavirus

Nijar: An fara feshin magani kan Corona a makarantu

Published

on

Hukumomin a jahar Damagaram sun kaddamar da fara feshin maganin rigakafin Covid-19 a cikin makarantun boko

A sadiyar Litinin dinnan ne shugaban kwamitin yaki da wannan cuta kuma magatakardar fadar gwamnan jihar Damagaram ya jagoranci bikin kaddamar da feshin a cikin makarantar Mela Douaram da ke tsakiyar birnin na Damagaram.

Magatakardar ya bayyana cewa sun fara wannan aiki ne a wani mataki na kare daliban daga kamuwa da wannan cuta ta Covid-19.

Wakilin mu Yakubu Umar Mai Gizawa ya rawaito mana cewa tun a kwanakin baya ne dai gwamnati ta sanar da ranar daya ga watan Yuni mai zuwa a matsayin ranar ranar da za’a koma bakin ajijuwan makarantun bayan shafe tsawan lokaci suna rufe sakamakon yaki da ake da cutar Covid-19.

Labarai masu alaka:

Amsoshin tambayoyi 20 kan cutar Corona – Dr. Ibrahim Musa

Covid-19: Gwamnati ta bada damar cigaba da sufuri a Nijar

Continue Reading

Listen Live

Freedom Radio Kano 99.5 FM Freedom Radio Kaduna 92.9 FM Freedom Radio Dutse 99.5 FM Dala FM Kano 88.5

Now Streaming

Subscribe to Freedom Radio via Email

Enter your email address to subscribe to this site and receive notifications of new posts by email.

Join 324,535 other subscribers.

Trending

Copyright © 2019. Freedom Radio Group. All Rights Reserved.

error: Content is protected !!