Shugaba Tinubu ya sauka a kasar Kenya don halartar taron koli

Shugaban kasa Bola Ahmad Tinubu ya isa birnin Nairobi na kasar  Kenya don halartar taron kolin Afirka da Faransa da aka shirya gudanarwa tsakanin yau da gobe.

Taron mai taken “Afirka ta ci gaba: Haɗin gwiwar Afirka da Faransa don kirkire-kirkire da ci gaba,” zai tattauna kan muhimman batutuwan da suka shafi nahiyar, ciki har da sauyin makamashi, masana’antu masu zaman kansu, ayyukan sauyin yanayi da kuma gyare-gyaren tsarin kuɗaɗen duniya.

Daga cikin waɗanda suka tarbi shugaba Tunibu akwai Ministan Masana’antu da Zuba Jari, Dakta  Jumoke Oduwole da  Ministan Muhalli Balarabe Abbas Lawal da  Ministan Noma da Tsaron Abinci  Sanata Abubakar Kyari da Ministan Harkokin Waje  Ambasada Bianca Odumegwu-Ojukwu da  Ministan Harkokin Waje Ambasada Sola Enikanolaye.