Shugabannin yan bindiga a Katsina sun yi saranda

Wasu manyan shugabannin yan bindiga 26 da suka addabi jihar Katsina sun ajiye makaman yakin su tare da mika wuya a Alhamis din nan.

Kwamishinan ‘yan sandan jihar Sanusi Buba ne ya bayyana hakan yayin da yake baja kolin shugabannin tare da mabiyansu wadanda suka ajiye makamai da alburusai.

Buba ya ce shugabannin ‘yan bindigar da kansu suka fito daga maboyarsu a cikin daji tare dayin tir da ayyukan da suke yi na fashi, kuma sun yi hakan ne ba tare da wani sharadi ba.

Kwamishinan ‘yan sanda ya bayyana sunayen shugabannin ‘yan bindigar da suka hadar da Sale Turwa, Mani Turwa, Ado Sarki da kuma Sani Mai-Daji.

Sanusi Buba ya gargadi sauran ‘yan bindiga masu tayar da kayar baya, wadanda suka ki mika wuya da su gaggauta sake tunani don samarwa kan su mafita.