Siyasa: Gwamnonin PDP 13 suna gudanar da taron gaggawa a jihar Oyo

Gwamnonin jam’iyyar PDP guda goma sha uku sun fara gudanar da wani taro na sirri a birnin Badun na jihar Oyo.

Rahotanni sun ce gwamnonin suna gudanar da taron ne a cibiyar kula da harkokin noma a kasashe masu zafi da ke birnin na Badun.

Gwamnonin da suka halarci taron sun hada da: Aminu Waziri Tambuwal na jihar Sokoto, Okezie Ikpeazu na Abia, Ahmadu Fintiri na jihar Adamawa, Udom Emmanuel na jihar Akwa Ibom da Bala Mohammed na jihar Bauchi da kuma Duoye Diri na Bayelsa sai kuma Samuel Ortom na jihar Benue.

Sauran sune: Ben Ayade na jihar Cross Rivers, Ifeanyi Okowa na Delta, Ifeanyi Ugwuanyi na jihar Enugu, Godwin Obaseki na Edo, Nyesom Wike na jihar Rivers da Bello Matawalle na jihar Zamfara, wanda ya samu wakilcin mataimakinsa Alhaji Aliyu Gusau.