Sojoji sun hallaka yan bindiga guda biyar, a Kaduna

Dakarun sojin Nijeriya na runduna ta daya da ke aiki a karamar hukumar Chikun ta jihar Kaduna sun samu nasarar hallaka ‘yan bindiga guda biyar, tare da kwato bindigogi kirar AK47 guda hudu.

Mai rikon mukamin mataimakin daraktan yada labaran rundunar Laftanar Kanar Musa Yahaya ne ya tabbatar da hakan ta cikin wata sanarwa da ya fitar jiya Juma’a.

Kanar Musa Yahaya ya ce wannan wani bangare ne na aikin fatattakar ‘yan bindigar da suka addabi yankin arewa maso yammacin kasar nan.

Inda suka kai samame wurare irin su titin Kanti zuwa Tantatu da ke Dajin Kubusu, da kuma yankin Tuddan Kaso a jihar ta Kaduna.

Sanarwar ta ce sauran makaman da aka gano a hannun ‘yan bindigar sun hada tarin harsasai da Babura guda uku da adda guda daya da wayoyin hannu guda biyu da kuma kayan tsubbace-tsubbace.