Sunday Igboho na da alaƙa da Boko Haram – Abubakar Malami

Gwamnatin tarayya ta gano masu daukar nauyin jagoran tsagerun Yarabawa Sunday Igboho.

A cewar gwamnatin yana da alaƙa da masu daukar nauyin ƴan ƙungiyar Boko Haram.

Ministan shari’a kuma atoni janar na tarayya Abubakar Malami ne ya tabbatar da hakan yayin taron manema labarai a Abuja.

Abubakar Malami ya ce bincikensu ya gano yadda aka tura wa Sunday Igboho kuɗi sama da naira miliyan 127 ta asusun banki 43 cikin bankuna 9.

Ministan ya kara da sun gano cewa Sunday Igboho yana da alaƙa da mutumin nan da aka yanke wa hukuncin ɗaurin rai-rai a Haɗaɗɗiyar Daular Larabawa Surajo Abubakar Muhammad, sakamakon samunsa da laifin daukar nauyin kungiyar Boko Haram.