Ta’addanci: ‘Yan bindiga sun kashe mutane 2 a Kaduna

Wasu ‘yan bindiga sun kai hari a kauyen Wawan Rafi da ke karamar hukumar Zangon Kataf a jihar Kaduna tare da kashe mutane biyu da safiyar jiya Litinin.

Kazalika ‘yan bindigar sun kone gidaje bakwai da mota daya tare da babur yayin harin.

Wannan dai na cikin wata sanarwa da kwamishinan tsaro da harkokin cikin Gida Samuel Aruwan ya fitar.

Ta cikin sanarwar Aruwan ya bayyana sunayen mutanen biyu da aka kashe da suka hadar Joshua Dauda da dansa mai shekaru bakwai Philip Dauda.

A cewar sanarwar tuni jami’an sintirin suka fatattaki mahaharn lamarin da ya tilasta musu tserewa zuwa daji, sai dai sojoji sun yi nasarar kwato wasu akwatuna 8 da harsasai.