Tasirin Kwankwaso a Kano kaɗai ya ishe mu – Saƙon Doguwa ga Ganduje

Shugaban masu rinjaye na majalisar tarayya Alhasan Ado Doguwa ya ce rigimar tasirin Kwankwaso a siyasar Kano kaɗai ta ishi jam’iyyar APC idan ba a samu ɗinke ɓarakarta ba.

Doguwa na martani ne kan zargin da ake masa na yiwa Mataimakin ɗan takarar Gwamnan APC a Kano Murtala Sule Garo rauni.

Ya ce “Ba za a ɗinke ɓaraka ba sai Gwamnan Kano ya yarda kowa ɗansa ne, sai Ganduje ya yarda Murtala ɗa ne, muma ƴaƴa ne, domin muna fuskantar muguwar barazana daga abokan hamayya”.

“Kowa ya san tasirin da tsohon Gwamna Kwankwaso ya ke da shi a jihar Kano, wannan rigimar kaɗai ta ishe mu”.

Alhassan Ado dai ya musanta cewa shi ne ya yiwa Murtala Garo rauni, inda ya ce sun dai yi cacar baki, amma zamewa Murtalan ya yi.