Tsaro – Ƴan bindiga sun sace kwamishina a Neja

Ƴan bindiga sun yi garkuwa da kwamishinan yaɗa labarai na jihar Neja Muhammad Idris.

Ƴan bindigar sun je gidan kwamishinan ne a ƙauyen Baban Tunga da ke ƙaramar hukumar Tarfa a ranar Lahadi tare da yin awon gaba da shi.

A zantawar shugaban karamar hukumar Ibrahim Mami da wakilinmu Nuradden Isyaku Daza ya tabbatar da faruwar lamarin.

Ibrahim Mami ya ce, ƴan bindigar sun sace kwamishinan da misalin ƙarfe sha ɗaya na daren yayin da ake tsaka da ruwan sama a yankin, sai dai har zuwa yanzu basu nemi iyalan sa ba don fara tattaunawa ba.

Sai dai itama rundunar ƴan sandan jihar ta bakin mai magana da yawun ta Wasi’u Abiodun ya tabbatar da faruwar lamarin, amma dai bai yi ƙarin bayani akai ba.