NARD – A shirye muke mu janye yajin aiki

Ƙungiyar likitoci masu neman ƙwarewa reshen asibitin Aminu Kano ta ce, a shirye ta ke ta janye yajin aikin da ta tsunduma.

Sakaren kungiyar Dakta Tahir Sani ne ya bayyana hakan jim kaɗan bayan kammala shirin “Barka da Hantsi” na tashar Freedom Radio.

Dakta Tahir Sani ya ce, “Matukar gwamnati ta cika mana alƙawuran da muka kulla da ita, to kuwa za mu dawo bakin aiki ba tare da wani jinkiri ba”.

Sakataren kungiyar ya zargi cewa, gwamnatin tarayya ta gaza biyan su kuɗaɗen alawus-alawus na hatsarin aikin corona, da kuma albashin wasu daga cikin ma’aikata.

“Wannan ne ya sanya muka ga ba mu da wata mafita face mu tsunduma yajin aiki don jawo hankalin gwamnati” in ji Dakta Tahir Sani.