Tsohon Dan takarar Gwamna a jahar Gombe Hon. Jafar Abubakar Kwadon ya fice daga Jam’iyya APC

Tsohon Dan takarar kujerar Gwamna a jahar Gombe har Karo biyu Honourable Jafar Abubakar Kwadon ya fice daga jam’iyyar APC a ranar Alhamis data gabata

A wata takardar data samu sa hannunsa daya aikewa shugaban jam’iyyar APC na mazabarsa dake Kwadon a karamar hukumar Yamaltu Deba, Jafar yace ya fita daga jam’iyyar ce a bisa radin kansa sakamakon maida shi saniyar ware da aka yi. Ba a tuntubarsa a harkokin jam’iyyar bare kuma na Gwamnatin da suka bada gudumawa aka kafa.

Jafar ya tsaya takarar Gwamnan Gombe har Karo uku a inuwar jam’iyyar ADC a zabukan 2007, 2011 da kuma 2015 da suka gabata, wadda yazo na Uku a zaben 2011.
A shekarar 2018 Jafar ya fice daga jam’iyyar ADC inda ya koma jamiyyar APC a shekarar 2018 da suka hada karfi da Dan takarar ta Alh Muhammad Inuwa Yahaya, suka kuma yi nasara a zaben 2019.
Har ya zuwa lokacin da ake hada wannan rahoto Jafar dai bai bayyana jam’iyyar da zai koma ba, yace dai yana Kan tuntubar Magoya baya da Abokan arziki da zasu tsaida jam’iyyar da zai koma.