Wasikar Kwankwaso bata bi hanyar zuwa wurin shugaban kasa ba –Bashir Ahmad

Mai taimakawa shugaban kasa Muhammadu Buhari kan sabbin kafafan sadarwa na zamani Bashir Ahmad ya ce wasikar da Kwankwaso ya rubutawa shugaban kasa bata bi hanyar da ta dace ba domin isa ga shugaban kasa ba.

Bashir Ahmad ya wallafa a shafinsa na Twitter cewa, “wannan wasika ce zuwa ga shugaban kasa, ko kuma budaddiyar wasika ce ga mutanen Twitter? na san Injiniyya Rabi’u Kwankwaso a matsayinsa na tsohon gwamna ya fimu sanin sahihiyar hanyar aikawa da shugaban kasa wasika…

A safiyar litinin dinnan ne dai tsohon gwamnan Kano Engr. Rabi’u Musa Kwankwaso ya aike da wata wasika zuwa ga shugaban kasa kan halin da ake ciki a jihar Kano.

Cikin wasikar Kwankwaso yayi kak-kausar suka ga gwamnatin tarayya kan ta gaggauta kara daukan matakan kariya a jihar Kano, sannan ya nemi da gwamnatin tarayya ta samarwa da jihar Kano cibiyoyin gwajin cutar Corona akalla guda biyar.