‘Yan sanda sun nemi Buhari ya samar da kotun hukunta masu fyade

Rundunar ‘yan sandan kasar nan ta bukaci gwamnatin tarayya da ta samar da wata kotu ta musamman da zata rika sauraren kararrakin Fyade don yanke hukunci cikin sauri.

Mataimakin sufeton janar na ‘yan sandan kasar nan mai kula da sashen binciken Sirri Ibrahim Lamurde ne ya bayyana hakan lokacin da ya ke karbar bakuncin shugaban hukumar kare hakkin Dan Adam Tony Ojukwu da yannacin jiya Juma’a a birnin tarayya Abuja.

Ibrahim Lamurde ya ce samar da irin wadannan kotuna zai taka rawa wajen takaita ayyukan Fyade da ake yawan samu a kasar nan da kuma kwatowa wadanda aka yiwa hakkin su baya ga hukunta masu aikata wannan mummunar dabi’a.

A yayin na sa jawabin shugaban kumar kare hakkin Dan Adam na kasa Tony Ojukwu ya ce dama kwato hakkin Dan Adam shine aikin hukumar, kuma hukumar zata bada dukannin gudunmowar da ta dace don ganin hakan ta tabbata.