‘Yan sanda sun saki Nastura

Rundunar ‘yan sandan Najeriya ta saki shugaban hadakar kungiyoyin rajin kare Arewa, Nastura Ashir Sharif, a ranar Alhamis.

A ranar Talata ne ‘yan sanda suka cafke Nastura a Katsina, bayan ya jagoranci zanga-zangar lumana kan kisan da ‘yan bindiga ke yiwa wadanda basu ji ba basu gani ba.

Jim kadan da cafke shi ne kuma, ‘yan sandan suka tafi da shi birnin tarayya Abuja.

Wata sanarwa da kakakin kungiyar Abdul-Azeez Sulaiman ya fitar ya ce da yammacin ranar Alhamis ne rundunar ‘yan sandan Najeriya ta sako shugaban nasu.

Haka zalika fitaccen dan gwagwarmayar nan Ibrahim Garba Wala ya wallafa hotansu da Nastura Ashir din da suka dauka a shalkwatar rundunar ‘yan sanda da ke Abuja a shafin Facebook, bayan an sako shi.