Tsafta: Gwamnatin Kano ta rufe kamfanoni bisa karya dokar muhalli

Gwamnatin jihar Kano ta rufe wasu kamfanoni biyu saboda karya dokar tsaftar muhalli.

An rufe kamfanonin biyu Nina Plastic da Prosper Plastic da ke sarrafa robobi a unguwar Challawa saboda karya dokar tsaftar muhalli na ƙarshen wata.

Hakan ya faru ne yayin rangadin da Kwamishinan muhalli na Kano Dr. Kabiru Ibrahim Getso ya jagoranta da safiyar Asabar.

Kwamishinan ya ce, an hukunta kamfanonin ne ƙarƙashin kotun tafi da gidanka kan tsaftar muhalli.

Da ya ke, yanke hukunci mai shari’a Auwal Yusuf Sulaiman ya yanke musu hukuncin rufewa nan take, tare da biyan tarar Naira dubu dari biyar kowannensu kafin kammala bincike.