Za a samu mamakon ruwan sama a Kano tsawon kwanaki 3 da ma wasu jihohi – NiMET

Hukumar Kula da yanayi ta ƙasa NiMET ta yi hasashen samun mamakon ruwan sama mai ƙarfin gaske a Kano na tsawon kwanaki 3.

NiMET ta ce, za a samu mamakon ruwan har a wasu sassan ƙasar nan da dama kamar yadda ta fitar cikin wata sanarwa.

A cewar NiMET a waɗannan kwanakin jihohin Kano, Bauchi, Jigawa, Katsina, Zamfara, Kaduna, Kebbi, Sokoto da Neja za su fuskanci mamakon ruwan saman.

Sai dai ta ce, za a samu matsakaici ruwan saman a jihohin Yobe, Kwara, Ogun, Osun, Ondo, Legas, Edo, Delta, Taraba, Adamawa, Ekiti, Filato, Nasarawa da Benue, Enugu, Ebonyi, Anambra, Abia, Imo, Cross River da Akwa Ibom.

NiMet ta yi gargaɗin cewa, akwai yiwuwar samun ambaliyar ruwa musamman a jihohin da ake sa ran samun mamakon ruwan saman, da zai iya haifar da karyewar gadoji, rushewar gidaje da kuma hana tashin jirage.