Za mu ɗau mataki ga duk wanda muka samu da tada hankalin al’umma – Gwamnan Kano

Gwamnan jihar Kano Injiniya Abba Kabir Yusuf ya ce gwamnatin sa bazata lamunci barin duk wasu wanda zasu kawo barazanar tsaro a fadin jihar ba, inda gwamnan yace za’a dau matakin ba sani va sabo ga duk wanda aka kama da aikata laifi a yayin bukukuwan sallah.

Gwamna Abba Kabir Yusuf ya bayyana hakan ne a yayin da sarkin kano Alhaji Áminu Ado Bayero ya kawomai ziyara cikin wani ɓangare na bikin sallah ƙarama.

Gwamna Yusuf ya ƙara da cewa gwamnati zata tabbatar da ta samarwa da al’umma kyakkyawan tsaro a faɗin jihar.

Da yake jawabi tun da fari sarkin kano Alhaji Aminu Ado Bayero ya yabawa gwamnatin bisa yadda ta bayar da tallafin kayan abinci ga al’ummar jihar a lokacin watan azumin Ramadana domin saukakawa al’umma.

Haka kuma gwamnan kano Injiniya Abba Kabir Yusuf ya buƙaci al’umma da su mayar da hankali wajen sanya idanu ga al’umma domin samar da tsaro a fadin jihar dama ƙasa baki ɗaya.