Za mu sake gina shataletalen gidan gwamnati a Na’ibawa- Abba Kabir

Gwamnatin jihar Kano ta ce, za ta sake gina shataletalen kofar gidan gwamnati da ta rushe a gadar shigowa gari da ta ke a unguwar Na’ibawa.

Gwamnan jihar Abba Kabir Yusuf, ne ya bada umarnin rushe shataetalen da ke kofar fadar gwamnatin jihar a baya, saboda dalilan tsaro tare da kudirta sake gina shi a wajen da ya dace.

Mukaddashin Sakataren yada Labaran gwamnan jihar Hisham Habib, ne ya sanar da hakan, ta cikin sanarwar da ya fitar a daren Lahadin nan.

Ya ce, Gwamna Abba ya gana da Kaltume Ana wadda ta yi zanen shataletalen mai dauke da alamar cikar Kano shekaru 50 da kafuwa, tare da cimma matsayar sake gina sabon shataletalen mai inganci domin kara kawata Kano.