Za’a dawo da Ibadar Umara nan bada jimawa ba – Saudiya Arebiya

Kasar Saudi Arebiya ta sanar da cewa shirye-shirye sun yi nisa wajen ganin an dawo da gudanar da ibadar Umara a kasa mai tsarki, tun bayan hutun da aka tafi sakamakon barkewar annobar cutar Corona.

Ministan aikin Hajji da Umara Dr Muhammad Saleh bin Tahir Benten ne ya tabbatar da hakan lokacin da yake jawabi ta shafin intanet, domin sanar da kamfanonin jiragen saman da ke jigilar maniyyatan game da shirin da kasar ta yi.

Dr Muhammad Saleh ya kara da cewa an yi tanadin matakan kariya daga yaduwar cutar Corona domin dakile yaduwarta a lokacin da za a koma aikin Umarar da sauran ziyarce-ziyarce.