Zan rage matsalar cin hanci idan na zama shugaban Najeriya – Peter Obi

Dan takarar shugaban ƙasa na jam’iyyar NDC, Peter Obi, ya yi alƙawarin rage cin hanci da rashawa da kuma tsadar tafiyar da gwamnati idan aka zaɓe shi shugaban ƙasa a shekarar 2027. 

Obi ya bayyana hakan ne bayan samun tikitin takarar shugaban ƙasa na jam’iyyar a babban taronta da aka gudanar a Abuja, inda ya ce za a karkatar da kuɗaɗen da ake ɓarnatarwa zuwa muhimman fannoni na tattalin arziki.

Ya kuma jaddada muhimmancin bin doka da oda, yana mai cewa gwamnatinsa za ta tabbatar da cikakken ‘yancin bangaren shari’a ba tare da tsoma bakin gwamnati ba. A cewarsa, hakan zai taimaka wajen jawo masu zuba jari da kuma ƙarfafa amincewar jama’a da cibiyoyin gwamnati.

Baya ga haka, Obi ya zargi gwamnatin da ke mulki da takura wa jam’iyyun adawa, yana mai cewa wasu na fuskantar tsangwama da hana gudanar da ayyukansu cikin ‘yanci.