Ƴan bindiga sun saki fursunonin da ke tsare a gidan gyaran hali na Oyo

Wasu ƴan bindiga da ba a san ko su waye ba sun kai hari gidan gyaran hali na Abolongo da ke garin Oyo.

Ƴan bindigar sun kai harin a daren ranar Juma’a tare da sakin fursunonin da ba a san adadin yawansu ba a gidan yari.

Olarewaju Anjorin shi ne jami’in hulɗar da Jama’a na hukumar kula da gidajen yari reshen Jihar Oyo, ya tabbatar da faruwar lamarin da safiyar Asabar a zantawar sa da manema labarai a Ibadan.

Anjorin ya ce harin ya faru ne da misalin karfe 9.50 na daren Juma’a.

Rahotonni sun tabbatar da cewa maharan na dauke da muggan makamai tare da razana masu gadin gidan sannan suka kutsa kai ciki tare da sakin fursunonin.

“Ina nan a yanzu tare da Kwanturola da wasu manyan jami’an kula da gidan yarin don tantance ɓarnar da aka yi wa gidan”.

“Yanzu, ba za mu iya tantance adadin fursunonin da aka saki da waɗanda suka jikkata ba, amma tabbas nan gaba zan yi muku karin bayani” a cewar Anjorin.