Ƴan sanda sun cafke jami’in da ya hare ɗan kasuwa a Abuja

Rundunar ‘ƴan sandan birnin tarayya Abuja, ta ce, ta cafke wani jami’in gidan gyaran hali da ake zargi da harbe wani mutum mai suna Ibrahim Yahaya a kasuwar Wuse da ke tsakiyar birnin.

Kisan mutumin dai ya janyo hatsaniya a kasuwar da yammacin jiya Talata, lamarin da ya janwo asarar dukiya.

Hakan na ƙunshe ne ta cikin wata sanarwa da mai magana da yawun rundunar ƴan sanda ta Abuja, Josephine Adeh ta fitar, ta ce jami’in ya harbe Yahaya ne a lokacin da yake yunƙurin tserewa bayan da rundunar tsaftace Abuja ta kama shi ta kuma gurfanar da shi a gaban kotun tafi da gidanka da ke Kasuwar Wuse, inda aka yanke masa hukunci.

Sanarwar ta ƙara da cewa yanzu haka rundunar ta na tsare da jami’in inda take gudanar da bincike.