Ɗaliban jami’ar tarayya a Gusau sun gudanar da zanga-zangar lumana

Ɗaliban jami’ar tarayya da ke Gusau babban birnin jihar Zamfara, sun gudanar da zanga-zangar lumana domin nuna damuwa kan garkuwar da ƴan ta’adda suka yi da ƴan uwansu ɗalibai.

Ɗaliban waɗanda suka yi zagaye a birnin Gusau, sun kuma rufe babbar hanyar da ta tashi daga Gusau zuwa garin Funtua na jihar Katsina.

Rahotonni sun ce, a daren Jumu’ar da ta gabata ne ƴan bindiga suka yi garkuwa da ɗaliban a yankin Damba da ke dab da shiga birnin Gusau.

Jihar ta Zamfara dai na cikin jihohin da ke fama da hare-haren ƴan ta’adda masu yin garkuwa da mutane domin karbar kudin fansa.